Bakoena ba ha Maieane

Ke Mokoena oa Maieane,
Oa khomo ea Leruo,
Leruo la khomo, mora Motloheloa,
Ba Mmamotetenene oa Khosi,
Ba khatampi e ntle, sebapalla,
Ba maleruo le tloha ho khomo, le ee ho motho.
Pai, Mokhoenyana o mo siea ho kae?
Se je Mokhoenyana hara lepatlelo!

Bafokeng ba ha 'Mapulungoana Phahla

Ke thelleleng ke le mofokeng oa ha 'Mapulungoana Phahla,
Matotomala, manyela tlatlana,
Malepeletsa lilomo ka masepa,
Khomo ea teng ha e tsoale bosiu,
E tsoala mots'eare banana ba e shebile,
Ha e tsoala bosiu ea hlola!

Bafokeng ba ha Molise

Ke Mofokeng, Mokomane oa ha Molise,
Motho oa Matika a Lesaoana,
Motho oa ha Nyomenyome,
Motho oa Matlapa ha le ribolloe,
Motho oa Mahlono ha e phome,
Oa ha Khomo e matha ka lebelo thoteng!

Bataung ba ha Molete

Ke thelleleng ke le motaung oa ha Molete,
Batho ba 'Makoaba a siea,
Batho ba sa jeng sengoathoana sa maobane,
Batho ba mats'ola nku e folle mokekeng,
Bakone ba senna ba e supa-supa ka menoana!

Bakubung

Ke thelleleng ke le Mokubung,\nKe Mokubung oa Mohlamatsana,
Mohloka koli, motseba tsa ba bang,
Motho oa Lesoetsa la Maitjali.
Mohale, motsoa lehlakeng,
Motho oa mokopu o motololi,
Le o nts'e masimong!

Bataung ba ha Nthethe oa Morapeli

Ke Motaung oa Nthethe a Morapeli,
Ngoana ts'esana nkope,
E tla re mohla a tla shoa,
A khaoloe hlooho,
A sale a nyeketha ka mahetlana,
Ka pakana tsa melala,
Oa Mmakatisa leloko,
Tau ha e qaloe seforong,
E bolaea motho!

Batloung ba ha Sekhoane

Ke thelleleng ke le mokholokoe,
Ke le Motloung oa ha Sekhoane,
Oa "Tlo ke o pepe",
Ke o sihletse,
Ke o tlame ka thari ea konyana,
E be ke matha ka oena!

Bakhatla

Ke Mokhatla oa Seoli sa ha 'Mamathe,
Sa ha Masopha, lesolla,
Ntsukobokobo, Letlakapipi,
Seja khomo ka 'moho, se ila mosoang,
Seoka, seokaoka se le holimo,
Seutla se marantha.
Molala sepela, a seselela liloena,
Mokhatla ka ho ikhatla ha 'ngoe,
Motho oa maja sebera,
Mokhatla oa Bakhatla a khabang,
Ka ho ikhatla ka mokhatlo oa Bokhatla,
Bakhatla, khatlanang le Bakhatla babo lona!

Makhoakhoa a ha Mahlatsi

Ke thelleleng ke le mokholokoe,
Ke le Lekhoakhoa la ha Mahlatsi,
Batho ba ha Mahlatsi ba kaalo ka linaleli,
Ba kaalo ka joang ba ts'aane, molelengoane,
Ke batho ba ha Mamphamo a Mahasa,
Batho ba Sepharumele sa Mongalo,

Ke batho ba ha Mamotlotlo o a batloa,
Motlhotlo bosiu o ba mokhubelu,
Mots'eare o ba mosootho,
Batho ba ha Mahlatsi ha se ba ho ea le batho ntoeng,
Ha ba ea le batho mahlare a a lala,
Ho cha lithota, bo Atanye le bo Kolonyama,
Liea ha Mahlatsi li ea ka bohlale,
Ha o ea ha Mahlatsi o ee ka bohlake,
Bona sekoti tseleng o tla oela!

Banareng ba ha Tsoelipa Mats'oele

Ke Monareng oa ha Tsoelipa Mats'oele,
Tsoelipa,
Nare ea e ja Lekholela,
Molimo oa Shekeshe o na le matla,
A na tlohela poli a tlolela thotolo,
Ho cho bo Molikoe le Motohoana!

Basia

Ke thelleleng ke le mosia motobatsi,
Motho oa mants'a lithebe li ome,
Li senna li omela mokhoabo-tlung,
Motho oa Ts'ele ea Lebajoa!

Bats'oeneng

Ke thelleleng ke le Mots'oeneng oa ha 'Makhiba,
Leleme le lets'o.Le lets'o ke ho koma litlhare,
Ts'oene nkalime lirao,
Ke lo ritama thabeng,
Hobane tsa hao liboea li tla nts'oanela!

Makholokoe

Ke thelleleng ke le mokholokoe,
Makholokoe, Makotsoana,
Mahlaba khoho ka lemao,\nA e ise ho Mokholane khorong,
A re: Bona morena, ke hlabile.
Ke hlabile manoni a maholo,
Batho ba Rapeso,
Batho ba Seea pele khotsong,
Ho sa busa Letlatsa le Lephats'oana,
Batho ba ha Oetsi,
Batho ba ha Marooa le Molotsana,
Batho ba Rapeso!

Conclusion

Re ithutile ho rokela liboko tsa Basotho, ra ithuta sechaba sa Basotho 'me re tseba Basotho ka botlalo.